ညည အစောအိပ်ဖြစ်တာကြာပြီ။ တလကျော်လောက် ရှိမည် ထင်၏။ မနက်ခင်း အစောထ ဖြစ်နေတာနဲ့ ညဘက် အစောအိပ် ဖြစ်သွားခြင်း ဖြစ်၏။ မနက်ပိုင်း အမေ့ကို ဆွမ်းတော်ကပ် ကူ၊ ဆွမ်းလောင်း ကူ ရသောကြောင့် အစောထ ဖြစ်နေခြင်း ဖြစ်၏။ အစောထရတော့ အစော အိပ်ရာ ဝင် ဖြစ်သွားတာပေါ့လေ။

EPL ပွဲတွေ မရှိတော့ တခုခု လိုနေသလိုပင်။ အထူးသဖြင့် United ပွဲ မရှိခြင်း ဖြစ်၏။ နိုင်ပွဲတွေ ပျောက်နေတုန်းက တောက်လျောက် ဝေဖန် ဆူပူ ပေးနေရပြီး ခု နိုင်ပွဲ ဆက်နေလို့ ချီးကျူးမယ် ဆိုခါမှ နိုင်ငံပွဲတွေ ကစားမှာမို့ လိဂ်ပွဲတွေက နှစ်ပတ်လောက် နားထားပေလိမ့်ဦးမည်။ United အကြောင်း ပြောနေကြ ဆိုတော့ မပြောရတော့ တခုခု လိုနေသလိုပင်။ အပြစ် ဆိုတာထက် ချီးကျူးရမယ့် အချိန်ကြမှ လိဂ်ပွဲတွေက မရှိနေတာမျိုး ဖြစ်၏။

(ပန်း မလဲရသေးခင်)ရာသီဥတု ပူလာမှု နှင့်အတူ နောက်ထပ် ကြုံရတာက ဘုရားပန်း ဖြစ်ချေ၏။ မမှန်သည့် လျှပ်စစ်မီး နှင့်အတူ ဘုရားပန်းတွေလည်း ကြာရှည် မခံတော့ပေ။ အေးသည့် အချိန်ထက် စာရင် ယခုလို ပူသည့်အချိန်မှာ ဘုရားပန်းက ညှိုးနွမ်းတာ ပိုပြီး မြန်လေ၏။ ဒါတောင် ရေကို ပုံမှန်လဲလှယ် ပေး၏။ ပြီး ကျနော်တို့က တောင်ပေါ်ဒေသ ဖြစ်နေလို့သာ၊ အပူပိုင်း ဒေသဆို ပိုဆိုးမလားပဲ။ ဒါပေမယ့်လည်း သူ့အရပ် သူ့ဒေသနဲ့ လိုက်သည့် ပန်းမျိုးတွေတော့ ရှိမှာပါပဲလေ။ အဆင်ပြေသလိုပေါ့။

ဒီတပတ်မှာတော့ လိဂ်ပွဲစဉ်တွေအစား နိုင်ငံအသင်း ပွဲစဉ်တွေသာ ရှိ၏။ World Cup qualification, UEFA Nations League ပွဲစဉ်တွေ ယှဉ်ပြိုင်ကစားကြမည် ဖြစ်၏။ နိုင်ငံအသင်း ပွဲစဉ်တွေကိုတော့ သိပ် မကြည့်ဖြစ်လှပေ။ အချိန် နောက်ကျတာလည်း ပါတာပေါ့။ နောက်ကျဆိုလို့ အားလုံးက နောက်ကျနေတာတော့ မဟုတ်ပေ။ မြန်မာ စံတော်ချိန်နဲ့ ကြည့်မယ်ဆိုရင် အာရှက ညနေဘက်တွေ၊ အာဖရိက ညဘက် နည်းနည်းစော၊ ဥရောပကကြ ညတော်တော်နက်၊ မြောက်နဲ့ တောင်အမေရိက ဇုန်တွေကကြ မနက်အစောပိုင်းတွေ ဖြစ်၏။

ရာသီဥတုက သိသိသာသာ ပူလာခဲ့၏။ တရက်ထက် တရက် ပိုပြီး ပူလာခဲ့၏။ ဒီနွေက ပြီးခဲ့သော နွေထက် ပိုပြီး ပူမယ်ထင်။ တနှစ်ထက် တနှစ် ပိုပြီး ပူလာတာတော့ အမှန်ပင်။ လူသားတို့ကြောင့် သဘာဝ ပတ်ဝန်းကျင်တွေလည်း ပြောင်းလဲ ဖောက်ပြန်လို့နေသည် မဟုတ်လား။ ဥတုရာသီ တောကို မှီတဲ့ ဒီလောက် တောတွေ ခုတ်နေမှတော့ ရာသီဥတု ခမြာ ဘာကို သွားမှီလို့ မှီရလေတော့မည်နည်း။ ကမ္ဘာကြီး ဒုက္ခ ပေးနေသူများက လူသားတွေပင် မဟုတ်ပါလား။

ကျနော့် အိမ်ရှေ့ လမ်းက တဖက်ပိတ် လမ်း ဖြစ်၏။ ( ရှေ့က ပိုစ့်တခုမှာတော့ ပြောပြခဲ့ဖူး) ၆ အိမ်လောက် သုံးသည့် လမ်းလေးပေါ့။ တဖက်ပိတ် ဆိုသည့် အတိုင်း လမ်းအဆုံးထိပ်မှာ အိမ်တအိမ် ရှိ၏။ ကျနော့် အိမ်ကတော့ ၂ အိမ်ကျော် ဖြစ်၏။ တဖက်ပိတ် လမ်းကိုမှ ၆ အိမ်လောက်သာ ရှိသည်မို့ ကိုယ်ပိုင်လမ်းလို ဖြစ်နေသည်ဟု ပြောလို့ရမည်။